Дүрэм журам

НЭГДҮГЭЭР БҮЛЭГ. ЕРӨНХИЙ ЗҮЙЛ 1. дүгээр зүйл. Нэр, хууль эрх зүй Монголын үндэсний морьт харвааны холбоо /цаашид холбоо гэх/ нь Монгол Улсын Үндсэн хууль, Төрийн бус байгууллагын тухай хууль, Биеийн тамир, спортын тухай хууль, Дэлхийн морьт харвааны холбооны дүрэм, бусад холбогдох хууль тогтоомж, дүрэм журам, нийтээр хүлээн зөвшөөрөгдсөн олон улсын хэм хэмжээ болон энэхүү дүрмийн хүрээнд үйл ажиллагаагаа явуулах ашгийн төлөө бус, нийгэмд үйлчилдэг төрийн бус байгууллага мөн. 1.1. Холбооны албан ёсны нэр: Монголын Үндэсний Морьт Харвааны Холбоо, товчлол нь МҮМХХ Холбооны нэрийг англи хэл дээр: Mongolian Traditional Horseback Archery Federation / MTHAF / болно. 1.2. Холбоо нь хуулийн этгээдийн эрхийг эдлэх бөгөөд үйл ажиллагаа, эрх ашгаа хуулиар хамгаалуулна. 1.3. Холбоо нь ёс зүйн дүрэмтэй байна. 1.4. Холбоо албан бичгийн хэвлэмэл хуудас, тамга тэмдэг, онцлох лого, сүлд дуу, тугтай байна. 2. дугаар зүйл. Холбооны эрхэм зорилго 2.1. Олимпизмын үзэл санааг эрхэмлэн монгол өв соёлоо хүндэтгэн эх орондоо Монгол үндэсний спортын төрөл болох морьт харвааны спортыг хөгжүүлэх, сурталчилах, дэмжих, чансаа өндөртэй тамирчдыг бэлтгэн олон улс, тив, дэлхийн чанартай тэмцээн, фестивал наадамд амжилттай оролцуулахад оршино. 3. дугаар зүйл. Холбооны үндсэн зорилго 3.1. Монгол оронд морьт харвааны спортыг хөгжүүлэх, сурталчлах, материаллаг баазыг бэхжүүлэх; 3.2. Морьт харвааны тив, дэлхий, олон улсын чанартай тэмцээнүүд болон дотоодын бүх шатны уралдаан тэмцээнийг эх орондоо батлагдсан дүрмийн дагуу зохион байгуулах; 3.3. Үндэсний шигшээ багийг байгуулж, тив, дэлхий, олон улсын тэмцээнүүдэд бэлтгэн амжилттай оролцуулах; 3.4. Монголын морьт харваачдыг олон улсын жишгийн дагуу эрэмбэлж, тамирчдын нэгдсэн чансаа тогтоох, 3.5. Холбооны дэргэд байгуулагдсан төвүүд болон орон нутаг дахь салбар холбоод, гишүүн клуб, спорт хороодыг удирдлага арга зүйгээр ханган ажиллах. 3.6. Спортын зэрэг цол болон бусад шагнал урамшуулалд тамирчдыг тодорхойлох, урамшуулах 4. дүгээр зүйл. Холбооны эрх, үүрэг 4.1. Морьт харвааны спортыг хөгжүүлэх тухай холбооны хөгжлийн баримт бичиг журмуудыг боловсруулан батлах, хэрэгжүүлэх; Үүнд: 4.1.1. Морьт харвааны спортын сургалтын стандарт, хөтөлбөр 4.1.2. Морьт харваачдын нэгдсэн бүртгэл үүсгэх чансаа тогтоох журам боловсруулах 4.1.3. Морьт харвааны сургалтын аюулгүй ажиллагааны зааварчилгаа 4.1.4. Морьт харвааны багш дасгалжуулагчийн стандарт 4.1.5. Морьт харвааны олон улсын болон дотоодын шүүгч бэлтгэх журам боловсруулах шүүгч бэлтгэх 4.1.6. Морьт харвааны дотоодын болон олон улсын тэмцээн зохион байгуулах журам боловсруулах 4.2. Дэлхийн бусад олон улсын голлох морьт харвааны холбоонд гишүүнээр элссэн бол гишүүний үүргийг биелүүлэх; 4.3. Морьт харвааны тив, дэлхий, олон улсын чанартай тэмцээнүүдийг эх орондоо зохион байгуулах эрхийг авах, бүх шатны уралдаан тэмцээнийг зохион байгуулах; 4.4. Гадаад орноос мэргэжилтэн урих, мөн гадаад оронд мэргэжилтэн ажиллуулах, олон улсын хурал, семинар, сургалт, тэмцээн, уралдаанд оролцох Монголын баг, төлөөлөгчдийг сонгож, батлах, оролцуулах; 4.5. Холбооны дэргэдэх зөвлөлүүдийн үйл ажиллагааг чиглүүлэх, дэмжлэг үзүүлэх, хяналт тавих; 4.6. Үндэсний шигшээ багийг бүрдүүлэх, шигшээ багийн гишүүдтэй гэрээ байгуулах, шигшээ багийн бэлтгэлийн болон тэмцээний төлөвлөгөө, төсвийг батлах; 4.7. Морьт харвааны спортын холбогдолтой бүхий л асуудлаар төрийн болон төрийн бус байгууллагуудтай харилцах; 4.8. Холбооны тамирчид, дасгалжуулагчид, шүүгчид, ахмадын эрхийг хамгаалах; гомдол саналыг хүлээн авах, зохих журмын дагуу шийдвэрлэх 4.9. Холбоо нь өөрийн үйл ажиллагааг албан ёсоор олон нийтийн хэвлэл, мэдээллийн хэрэгслээр мэдээллэх. 4.10. Морьт харвааны олон улсын болон дотоодын тэмцээнийг шүүх эрх бүхий шүүгчдийг бэлтгэх холбогдох журмыг батлах, журмын дагуу шүүгч бэлтгэх 5. дугаар зүйл. Дүрмийн үйлчлэл 5.1. Дүрмийн үйлчлэл нь Их хурлаас Их хуралд байх бөгөөд Их хурлаар болон Удирдах зөвлөлийн гишүүдийн ээлжит болон ээлжит бус хурлаар дүрэмд нэмэлт өөрчлөлт оруулж батлана. 6. дугаар зүйл. Хууль эрх зүйн харъяалал 6.1. Холбоо нь Монгол улсад үйл ажиллагаагаа явуулах ба холбооны удирдлагын төв байр нь Монгол Улсын нийслэл Улаанбаатар хотод байна. Хаяг: Монгол Улс, Улаанбаатар хот, Баянзүрх дүүрэг, 14-р хороо, 203-104 тоот 6.2. Утас: +976 88106810 +976 94951234 Е-майл: 7. дугаар зүйл. Холбооны гишүүнчлэл, харьяалал 7.1. Монголын үндэсний морьт харвааны холбооны дүрмийг хүлээн зөвшөөрч, Монгол Улсын үндсэн хууль болон бусад хуулийн хүрээнд хамтарч ажиллах байгууллага, иргэд сайн дурын үндсэн дээр ямар нэг ялгаварлалгүйгээр тус холбооны үйл ажиллагаанд эвлэлдэн нэгдэнэ. 7.2. Морьт харвааны спортыг хөгжүүлэх сонирхолтой, Монгол Улсад үүсгэн байгуулагдсан МҮМХХ-ны дүрэм, журмыг хүлээн зөвшөөрсөн аймаг, дүүргийн бие даасан клубууд, байгууллага, хувь хүмүүс тус холбоонд гишүүнээр элсэж дараах ангилалд элсэж болно. 7.3. Гишүүн клуб гэж морьт харвааны спортын эсвэл түүнээс олон төрлөөр морин спортын тамирчин бэлтгэх үйл ажиллагаа явуулдаг хуулийн этгээдийг хэлнэ. 7.4. Гишүүн байгууллага гэж олон төрлийн үйл ажиллагаа явуулдаг байгууллагын дэргэд морьт харвааны спортыг хөгжүүлж хичээллэж буй сургалт болон тамирчин бэлтгэх үйл ажиллагаагаа явуулдаг хуулийн этгээдийг хэлнэ. Хувь гишүүн гэж ямар нэгэн клубд харьяалалгүй морьт харвааны тамирчин байх бөгөөд уг гишүүн нь тухайн жилийн гишүүнчлэлийн хураамжаа төлснөөр гишүүнчлэл баталгаажна. 7.5. МҮМХХ -нд гишүүнээр элсэхдээ доорхи материалуудыг бүрдүүлсэн байна. Үүнд: 7.5.1. Хүсэлтээ илэрхийлсэн тамга бүхий албан бичиг /өргөдөл/, хувь гишүүний өргөдөл 7.5.2. Улсын бүртгэлийн гэрчилгээний хуулбар /нотариатаар батлуулсан байх/ 7.5.3. Холбооны татвар төлсөн баримт /Холбооны гишүүнчлэлийн татварын хэмжээг УЗ-ийн хурлаар тогтооно/ 7.6. Дээрхи бичиг баримтыг бүрдүүлсэний дараа Түр гишүүнээр бүртгэж, Удирдах зөвлөлийн хурлаар татгалзах асуудал гараагүй тохиолдолд хурлын шийдвэрийг үндэслэн батламжилна. 7.7. Гишүүнчлэлийн хугацаа батламжилсан өдрөөс эхлэн 1 (нэг) жил байна. 7.8. Холбооны гишүүн байгууллагын багш дасгалжуулагчид, тамирчид нь харъяаллын дагуу холбооны гишүүн байна. 7.9. Холбоонд бүртгэлтэй татвараа төлсөн иргэнийг холбооны гишүүнд тооцох ба дотоодын тэмцээн уралдаанд зөвхөн гишүүнчлэлийн хураамжаа төлсөн гишүүд оролцох эрхтэй. 7.10. Ижил төстэй өөр холбоодын гишүүн байгуулга хувь хүнийг давхар ММХХ гишүүнээр бүртгэхгүй. 7.11. Гишүүнчлэлийн хураамжийг Удирдах зөвлөлийн гишүүд хуралдаж батлах бөгөөд жил бүр шинэчлэн тогтоож болно. 7.12. Гишүүнчлэлтэй клубын тамирчин нь тамирчны гишүүн клуб, байгууллагатай байгуулсан гэрээнд өөрөөр заагаагүй бол тамирчин харьяалалаа өөрчлөх боломжтой. Ямар ч тохиолдолд холбооны гишүүн клуб, байгууллагууд тамирчдын шилжилтийг хориглосон хатуу заалтыг тамирчинтай байгуулах гэрээнд тусгахыг хориглоно. 7.13. Тамирчин харьяалалаа өөрчилсөн талаархи мэдэгдлийг гүйцэтгэх захиралд бичгээр эсвэл холбооны албан ёсны цахим шуудангаар мэдэгдсэн өдрөөс хойш 1 сарын хугацаа өнгөрсний дараа шинэ клуб, байгууллагаа төлөөлөн тэмцээн, уралдаанд оролцох эрх нь нээгдэнэ. 7.14. Холбооны гишүүн клуб, байгууллага нь тамирчны шилжилтээс үүдэн санхүүгийн хохирол амссан гэж үзэж байгаа бол энэхүү асуудлаа тамирчинтай байгуулсан гэрээнийхээ хүрээнд шийдвэрлэх үүрэгтэй. 7.15. Гишүүн байгууллага, клубууд нэгдэж нэг клуб, байгууллага болж болно. Энэхүү нэгдсэн талаархи мэдэгдлийг гүйцэтгэх захирал болон албан ёсны веб хуудаст бичгээр эсвэл цахим шуудангаа мэдэгдсэн өдрөөс хойш 1 сарын хугацаа өнгөрсний дараа тухайн нэгдсэн байгууллага, клуб тэмцээн, уралдаанд оролцох эрх нь нээгдэнэ. 7.16. Гишүүн бус байгууллага, клубууд зөвхөн тэмцээн уралдаанд оролцохын тулд түр хугацаагаар нэгдэж болох бөгөөд энэ тухай тэмцээн болохоос дор хаяж 3 сарын өмнө гүйцэтгэх захиралд бичгээр мэдэгдсэн байна. 7.17. Гишүүнчлэлийг түтгэлзүүлэх, татгалзах, шийтгэл олгох 7.17.1. Холбооны эрхэм зорилго, үндсэн дүрэм болон бусад дүрэм журмыг удаа дараа эсвэл ноцтой зөрчсөн, холбооны нэр хүндэд хохирол учруулсан, Ёс зүйн дүрмийг зөрчиж энэ нь Ёс зүйн зөвлөлийн шийдвэрээр баталгаажсан бол 7.17.2. Морьт харвааны спортын нэр хүндэд харш үйлдэл хийсэн энэ нь баримтаар баталгаажсан бол 7.17.3. Гишүүн байгууллага, клуб, хувь гишүүнийг гишүүнээс хасах асуудлыг Ёс зүйн зөвлөлийн саналыг үндэслэн Удирдах зөвлөл шийдвэрлэнэ. Энэ тохиолдолд тухайн гишүүн байгууллага, клубын удирдлагад урьдчилан бичгээр мэдэгдэж, асуудлыг хэлэлцэх хуралд биеэр оролцон тайлбар өгөх уучлал хүсэх боломжоор хангана. 7.17.4. Хувь гишүүн, клуб болон байгууллага нь гишүүнчлэлээсээ хасагдсан тохиолдолд холбооны бүхий л үйл ажиллагаанд оролцох эрх нь дуусах бөгөөд энэ нь түүний буруутай үйлдлийн улмаас бусдад учруулсан бодит хохирлыг барагдуулах хариуцлагаас чөлөөлөх үндэслэл болохгүй. 7.17.5. Гишүүнчлэлээс хасагдсан тохиолдолд гишүүний татвар, хураамж болон бусад мөнгөн хандивыг эргүүлэн олгохгүй. 7.18. Клуб болон байгууллагын шалгуур 7.18.1. Гишүүдийн тоо доод тал нь 10-15 гишүүнтэй гишүүд нь холбооны идэвхитэй гишүүнчлэлтэй байх. 7.18.2. Клуб заавал дасгалжуулагч багштай байх ёстой. Багш дасгалжуулагч гэдэг нь холбооны багшийн сургалтанд суусан тэнцсэн сертификат буюу багшлах эрхийн бичиг авсан байх. 7.18.3. Клубын хураамжаа төлсөн байх. 7.18.4. Албан ёсны хуулийн этгээд тамга тэмдэг гэрчилгээтэй байх. 8. дугаар зүйл. Холбооны гишүүний эрх, үүрэг 8.1. Холбооны гишүүний эрх 8.1.1. Холбооны Их хуралд оролцох; 8.1.2. Сонгох, сонгогдох; 8.1.3. Холбооны баримт бичиг боловсруулахад оролцох, саналаа хэлэх, зөвлөх эрхтэй; 8.1.4. Холбооноос зохион байгуулагдах уралдаан тэмцээн болон бусад арга хэмжээнд оролцох; 8.1.5. Спортын цол, зэрэг авах; Холбооны бүхий л үйл ажиллагааны чиглэлээр мэдээлэл, сургалт авах. 8.1.6. Холбооны үйл ажиллагааг бүрэн, ил тод, олон нийтд нээлттэй тайлагнахыг шаардах 8.1.7. Холбооны үндсэн үйл ажиллагааны чиглэлийн дагуу үйл ажиллагаагаа явуулахыг шаардах 8.1.8. Энэхүү дүрмийн 4-р зүйлд заасан дүрэм журамтай танилцах, нээлттэй байлгахыг шаардах 8.2. Холбооны гишүүний үүрэг 8.2.1. Дэлхийн Морьт Харвааны Холбооны дүрэм, Дэлхийн сэргээшийн эсрэг дүрэм, Монголын Үндэсний морьт харвааны холбооны дүрэм болон холбооны ёс зүйн, аюулгүй ажиллагааны дүрмүүдийг тус тус чандлан сахих; 8.2.2. Холбооноос гаргасан шийдвэрийг хэрэгжүүлэх; 8.2.3. Холбооноос зохион байгуулах бүхий л арга хэмжээнд идэвхитэй оролцох; 8.2.4. Холбооны гишүүнчлэлийн жилийн татвараа цаг хугацаанд нь төлж байх. /Татварыг тухайн оны эхний улиралд багтааж, Удирдах зөвлөлийн хурлаар тогтоосон хэмжээний дагуу төлсөн байх/; 8.2.5. Морьт харвааны спортыг сурталчлан дэлгэрүүлэх, 8.2.6. Тамирчин гишүүн дотоод гадаадын уралдаан тэмцээнд оролцох болвол зохих бэлтгэл сургуулилтыг хийж, хамт олон, улсыг төлөөлөн нөөц боломжоо дээд хэмжээнд дайчлах 8.2.7. Гишүүн нь Монгол улсыг төлөөлөн уралдаан тэмцээнд оролцохдоо багийн ахлагчийн удирдлага, зохион байгуулалт доор бүхий л үйл ажиллагаагаа явуулах үүрэгтэй. 8.2.8. Морьт харвааны зам талбай, танхим, спортын хувцас форм, уламжлалт дээл малгай эд хэрэглэл, хамгаалах хэрэгсэл дуулга каск, бай шав материал, морьны эд хэрэгсэл, тоног төхөөрөмжийг тогтоосон журмын дагуу ашиглах 9. дүгээр зүйл. Холбооны хөрөнгө, санхүү 9.1. Холбоо нь өөрийгөө санхүүжүүлэх үндсэн дээр ажиллана. 9.2. Холбооны өмч хөрөнгөнд түүний үл хөдлөх хөрөнгө болон бусад хөрөнгө, өмчлөлд буй оюуны зүйлс хамаарна. 9.3. Холбооны санхүү нь гишүүнчлэлийн татвар, хэрэглэл материал ашигласны түрээсийн төлбөр, тэмцээнд оролцогчийн татвар, ажил үйлчилгээ, гишүүн, дэмжигчид болон гадаад дотоодын байгууллагуудын хандив, тусламж, бусад эх үүсвэрээс бүрдэнэ. 9.4. Холбоо нь төгрөгийн болон валютын харилцах данстай байх ба гүйлгээ хийхдээ 1 дүгээр гарын үсгийг Тэргүүн, 2 дугаар гарын үсгийг гүйцэтгэх захирал зурна. 9.5. Холбоо санхүүгийн тайлангаа харъяа дүүргийн татвар, санхүүгийн байгууллагад жилд 2 удаа хүргүүлэхээс гадна жилд нэг удаа Удирдах зөвлөлийн хуралд тайлагнана. 10. дугаар зүйл. Холбоог татан буулгах 10.1. Холбоо үйл ажиллагаа явуулах бололцоогүй болсон тохиолдолд Их хурлын шийдвэрээр татан буулгана. Татан буулгах эрх бүхий байгууллагын шийдвэр гарсанаар холбоог татан буугдсанд тооцно. 11. дүгээр зүйл. Холбооны тамга тэмдгийг ашиглах 11.1. Холбооны тамга тэмдгийг Тэргүүний эзгүйд Гүйцэтгэх захирал хариуцан хадгална. Тамгыг зөвхөн холбоонд хамааралтай үйл ажиллагаанд ашиглана. 12 дугаар зүйл. Холбооны бүтэц Холбоо нь дараах бүтэцтэй бөгөөд Их хурлаар сонгогдсоноос хойш 1(нэг) жилийн бүрэн эрхийн хугацаатай болно. 12.1. Их хурал 12.2. Тэргүүн 12.3. Дэд тэргүүн 12.4. Удирдах зөвлөл 12.5. Хүндэт гишүүн 12.6. Гүйцэтгэх захирал 12.7. Хяналтын зөвлөл 12.8. Санхүүгийн алба 12.9. Хяналтын хороо 12.10. Шүүгчдийн зөвлөл 12.11. Тамирчдын зөвлөл 12.1. Их хурал 12.1.1. Холбооны удирдах дээд байгууллага нь Бүх гишүүдийн хурал буюу Их хурал байна. Их хурлын чөлөөнд Удирдах зөвлөл үйл ажиллагааг удирдан явуулна. 12.1.2. Их хурал нь ээлжит, ээлжит бус байна. 12.1.3. Ээлжит Их хурал Удирдах Ээлжит Их хурал Удирдах зөвлөлийн гишүүдийн товлосноор 1 жилд нэг удаа хуралдана. Хурлын товыг 30 хоногийн өмнө зарлаж гишүүдэд мэдэгдэнэ. 12.1.4. Ээлжит бус Их хурал нь онцгой шаардлагатай үед Тэргүүний санаачлагаа Удирдах зөвлөлөөр зөвшилцсөний үндсэн дээр хуралдана. 12.1.5. Холбооны гишүүн байгууллагууд Их хуралд 3 хүртэлх удаа таслах эрхтэй оролцоно. Хувь хүмүүс болон бусад гишүүд нь Их хуралд үг хэлэх эрхтэй, таслах эрхгүй оролцож болно. Бусад байгууллагын зочид төлөөлөгчид урилгаар оролцож, үг хэлж болно. 12.1.6. Их хурал нь таслах эрхтэй гишүүдийн 51 хувь нь хүрэлцэн ирсэн тохиолдолд хүчин төгөлдөр болно. 12.1.7. Их хурал нь дараах бүрэн эрхийг эдэлнэ: Холбооны дүрмийг хэлэлцэж батлах, нэмэлт өөрчлөлт оруулах; Тэргүүнийг сонгох, чөлөөлөх; Хяналтын зөвлөлийг сонгох, чөлөөлөх 12.1.8. Тэргүүний тайлан илтгэлийг хэлэлцэж, дараагийн 1 жилийн үйл ажиллагааны үндсэн чиглэл, зорилтыг тодорхойлж батлах; Хяналтын зөвлөлийн тайланг хэлэлцэж дүгнэлт гаргах. Их хурал нь өөрөө хурлын дэгээ тогтооно. 12.1.9. Их хурал нь шийдвэрээ бичгээр, тогтоол хэлбэрээр гаргана. 12.1.10. Их хурал нь аливаа асуудлыг санал хураах хэлбэрээр зохион байгуулж шийдвэрлэх ба хувь хүний асуудлыг нууцаар, бусад асуудлыг илээр санал хурааж шийдвэрлэнэ. Их хурлын төлөөлөгчдийн 2/3 саналаар МҮМХХ дүрмэнд нэмэлт өөрчлөлт оруулж батлана. 12.1.11. Сонгуульд нэр дэвшигчид нь өөрийн намтар, мөрийн хөтөлбөрийг бичгээр гаргаж, хурлаас 14 хоногийн өмнө ажлын албанд өгсөн байна. 12.2. Тэргүүн Тэргүүний бүрэн эрх их хурлаар сонгогдсонос хойш 1 (нэг) жилийн хугацаанд хадгалагдаж 2 удаа улиран сонгогдож нийт 3 жил байна. 12.2.1. Тэргүүн дараах эрх, үүрэгтэй: 12.2.2. Тэргүүн өөрийн багийг бүрдүүлж ажиллах /Удирдах зөвлөл, дэд тэргүүн, гүйцэтгэх захирал, санхүүч/ 12.2.3. Тэргүүн Удирдах зөвлөлийн хурлын хооронд холбооны өдөр тутмын үйл ажиллагааг удирдлагаар хангаж ажиллах; 12.2.4. Гадаад, дотоод харилцаанд Холбоог албан ёсоор төлөөлөх; 12.2.5. Морьт харвааны спортыг хөгжүүлэх, холбооны санхүү, материаллаг баазыг нэмэгдүүлэх, боловсон хүчинг бэлтгэх, тамирчдын амжилтыг ахиулах чиглэлээр гэрээ хэлцэл хийх; 12.2.6. Их хуралд ажлаа болон хяналтын зөвлөлд тайлагнах; 12.2.7. Онцгой шаардлагатай үед Ээлжит бус Их хурлыг хуралдуулах саналыг Удирдах зөвлөлийн хуралд оруулах 12.3. Дэд тэргүүн Дэд тэргүүн дараах ажлуудыг хариуцна: 12.3.1. Тэргүүний эзгүйд түр орлох; 12.3.2. Гадаад, дотоод харилцаа, хамтын ажиллагааг өргөжүүлэх; 12.3.3. Холбооны хөгжлийн бодлогын хүрээнд хэрэгжүүлэх төсөл хөтөлбөрүүдийг боловсруулж, Удирдах зөвлөлийн хурлаар хэлэлцүүлэн батлуулж, хэрэгжүүлэх; 12.3.4. Холбооны санхүүг бүрдүүлэх олон талт үйл ажиллагааг удирдан зохион байгуулах. 12.3.5. Өөрийн хариуцсан чиглэлээр материалаг баазыг бэхжүүлэх, санхүүг бүрдүүлэх, боловсон хүчинг бэлтгэх, тамирчдын амжилтыг ахиулах зэрэг үйл ажиллагааны бодлого, чиглэлийг тодорхойлж, тэргүүнтэй зөвшилцөн Удирдах зөвлөлийн хурлаар хэлэлцүүлэн батлуулж, хэрэгжүүлэх; 12.3.6. Биеийн тамир, спортын асуудал хариуцсан төрийн болон төрийн бус байгууллагуудтай хамтран ажиллах; 12.3.7. Орон нутагт морьт харвааны спортыг хөгжүүлэх, сонирхогчдын хүрээг өргөжүүлэх; 12.3.8. Холбооны дэргэдэх байгууллагуудтай хамтран ажиллах. 12.4. Удирдах зөвлөлийн гишүүд Удирдах зөвлөлийн гишүүдийн тоо нийт 7 байх бөгөөд удирдах зөвлөлийн ажлын үндсэн хэлбэр нь ээлжит хурал байх бөгөөд ээлжит хурал нь жилд 2 удаа хуралдана. Цаг үеийн асуудлаар Удирдах зөвлөлийн ээлжит бус хурал хуралдаж болно. Удирдах зөвлөл дараах эрх, үүрэгтэй 12.4.1. Их хурлын товыг батлах; 12.4.2. Тухайн жилийн үйл ажиллагааны ерөнхий төлөвлөгөө, олон улсын арга хэмжээ, уралдаан тэмцээний төлөвлөгөөг хэлэлцэж батлах 12.4.3. Жилийн санхүүгийн тайлан, төсвийг хэлэлцэж батлах 12.4.4. Ёс зүйн дүрмийг батлах 12.4.5. Холбооны хөгжлийн бодлогын хүрээнд шаардлагатай зөвлөлүүдийг байгуулах; дэд Тэргүүн, Хяналтын зөвлөлийн жилийн тайланг хэлэлцэж дүгнэлт гаргах 12.4.6. Дүрэм, ёс зүйн зөвлөлийн дүгнэлтийг хэлэлцэж шийдвэрлэх; 12.4.7. Холбооны дэргэдэх зөвлөлүүдийн бүрэлдэхүүнийг батлах, чөлөөлөх, нөхөн томилох; 12.4.8. Холбоонд гишүүн элсүүлэх, батламжлах, чөлөөлөх; 12.4.9. Гадаад орноос мэргэжилтэн урих, мөн гадаад оронд мэргэжилтэн ажиллуулах, олон улсын хурал, семинар, сургалт, тэмцээн, уралдаанд оролцох монголын баг, төлөөлөгчдийг сонгож, батлах, оролцуулах; 12.4.10. Удирдах зөвлөлийн гишүүд дотоодод зохиогдох олон улсын чанартай тэмцээн, наадмыг зохион байгуулах хороонд орж ажиллах, гадаадад зохион байгуулагдах тэмцээн, наадамд багийн ахлагчаар оролцох, үр дүнг Удирдах зөвлөлийн хуралд тайлагнах; 12.4.11. Холбооны үйл ажиллагааг сурталчилах, хүрээг өргөжүүлэх талаар идэвхитэй оролцох; 12.4.12. Идэвхитэй үйл ажиллагаа явуулж байгаа Удирдах зөвлөлийн гишүүнийг урамшуулж олон улсын тэмцээнд явуулах; 12.4.13. Төрийн одон медальд тодорхойлох, холбооны шагнал, урамшууллын асуудлыг батлаж, байгууллага, хүмүүст олгох; 12.4.14. Удирдах зөвлөлийн гишүүд жилд нэг удаа Удирдах зөвлөлийн хурлаар тогтоосон хэмжээний татварыг холбоонд өгнө. 12.5. Хүндэт гишүүн Дараах нөхцөлийг хангасан тохиолдолд -ны Хүндэт гишүүнээр өргөмжилнө: 12.5.1. МҮМХХ -ны тэргүүн бөгөөд удирдах зөвлөлд 3 ба түүнээс дээш жил үр бүтээлтэй ажилласан 12.5.2. Монголын морьт харвааны спортын хөгжилд онцгой гавъяа байгуулсан 12.5.3. Хүндэт ерөнхийлөгч нь Удирдах зөвлөлийн гишүүний нэгэн адил дүрэмд заасны дагуу холбооны үйл ажиллагаанд оролцож болно. 12.5.4. МҮМХХ -ны үндсэн зорилгын хүрээнд зохион байгуулж буй үйл ажиллагаанд 3,000,000 төгрөг ба түүнээс дээш мөнгөн хандив өгсөн. 12.5.5. Монгол улсын хууль тогтоомжийн дагуу ял шийтгэл эдэлсэн, Холбооны Ёс зүйн зөвлөлийн шийдвэрээр шийтгүүлж байсан, сэргээшийн асуудлаар шалгагдаж байгаа эсвэл шийтгүүлж байсан этгээд хандив өгч болох боловч Хүндэт гишүүн болох боломжгүй. 12.5.6. Хүндэт гишүүн нь холбооны дүрэм болон бусад холбогдох журмыг мөрдөх бөгөөд зөрчсөн тохиолдолд ёс зүйн хорооны хурлаар орж шийтгэл хүлээсэн тохиолдолд Удирдах зөвлөлийн шийдвэрээр Хүндэт гишүүнээс хугацаагүйгээр түтгэлзүүлэх бөгөөд 12.5.4-т заасан хандивыг буцаан олгохгүй. 12.6. Гүйцэтгэх захирал Гүйцэтгэх захирлын эрх, үүрэг 12.6.1. Өдөр тутмын үйл ажиллагааг удирдан зохион байгуулах, салбар холбоод, холбооны гишүүн байгууллагуудыг бодлогын түвшинд чиглүүлэх, үйл ажиллагаанд нь хяналт шаардлага тавих; 12.6.2. Холбооны ажлын албаны бүтэц, зохион байгуулалт, ажлын байрны тодорхойлолтыг гаргаж, хүний нөөцийн асуудлаар тэргүүнд санал оруулах 12.6.3. Холбооны жилийн ажлын төлөвлөгөө болон гадаад, дотоод уралдаан тэмцээний хуваарийг боловсруулж Удирдах зөвлөлийн хурлаар хэлэлцүүлэх, батлуулах; 12.6.4. Холбооны дүрэм, журмын хэрэгжилтэнд хяналт тавьж ажиллах 12.6.5. Холбоонд гишүүн элсүүлэх, гишүүнээс чөлөөлөх асуудлыг тэргүүнтэй зөвшилцсөний үндсэн дээр Удирдах зөвлөлийн хурлаар хэлэлцүүлэх; 12.6.6. Холбооны дэргэдэх шигшээ багуудын бэлтгэлийн төлөвлөгөө, хэрэгжилтэд хяналт тавьж ажиллах 12.6.7. Монголын морьт харвааны холбооны баримт бичиг, түүхэн холбогдолтой материалуудыг архивлах 12.6.8. Холбооны үйл ажиллагаанд зарцуулах санхүүгийн төлбөр тооцоо хийх 12.6.9. Жилдээ 1 удаа Хяналтын зөвлөлд тайланг хүргүүлж, дүгнэлт гаргуулан Удирдах зөвлөлийн хурлаар танилцуулах 12.6.10. Гадаад харилцаа болон олон улсын тэмцээнүүдийн бүртгэл, зохион байгуулалт хийх, Монгол улсын шигшээ багийн дасгалжуулагч болон холбооны тэргүүнтэй хамтран багийг удирдан авч явах, тэмцээнд амжилттай оролцох бүхий л нөөц бололцоогоо дайчлан ажиллах 12.6.11. Олон улсын морьт харвааны холбоодууд болон бусад байгууллагуудтай холбоог төлөөлөн ажиллах 12.6.12. Удирдах зөвлөлийн гишүүдийн санал авах 12.6.13. Гүйцэтгэх захирлын нэг сарын цалин ……………….. (.......................) төгрөг байна. 12.7. Хяналтын зөвлөл Хяналтын зөвлөл нь 3 хүний бүрэлдэхүүнтэй байх ба Их хурлаар сонгогдоно. Хяналтын зөвлөл нь дараах чиг үүрэгтэй ажиллана: 12.7.1. Холбооны санхүү-өмч хөрөнгийн зарцуулалтанд хяналт тавьж ажиллана. 12.7.2. Жилд 1 удаа холбооны санхүүгийн үйл ажиллагаа, өмч хөрөнгийн ашиглалтанд хяналт шалгалт хийж, дүгнэлт гарган Удирдах зөвлөлийн хуралд танилцуулна. 12.7.3. 1 жилийн нэгдсэн тайланг Их хуралд тайлагнана. 12.7.4. Өөрийн үйл ажиллагааг хэрэгжүүлэхтэй холбогдсон журмыг боловсруулан Удирдах зөвлөлийн хурлаар батлуулж, ажиллана. 12.8. Санхүүгийн алба Санхүүгийн алба нь ... хүний бүрэлдэхүүнтэй байх ба хөрөнгө, санхүүгийн чиглэлээр үйл ажиллагаагаа явуулна: 12.8.1. Холбооны өдөр тутмын үйл ажиллагаа, түүнтэй холбоотой санхүүгийн асуудлыг зохион байгуулах; 12.8.2. Холбооны жилийн төсвийн төслийг Удирдах зөвлөлийн хурлаар оруулж, батлуулах. 12.8.3. Холбооны эд хөрөнгө, түүний ашиглалтын бүртгэлийг хөтлөх; 12.8.4. Холбооны эд хөрөнгө, санхүү, хэрэглэл материалтай холбоотой журам боловсруулан Удирдах зөвлөлийн хурлаар батлуулж, мөрдөх 12.8.5. Холбооны гишүүнчлэлийн татварын болон хэрэглэл материалын түрээстэй холбоотой асуудлыг хариуцах; 12.8.6. Холбооны аппаратын ажилчид, өдөр тутмын үйл ажиллагаатай холбоотой санхүүгийн асуудлаар тэргүүнд санал гаргах; 12.8.7. Жилд 2 удаа холбооны санхүүгийн тайланг харъяа дүүргийн татвар, санхүүгийн байгууллагад гаргаж тэргүүн, гүйцэтгэх захирал болон удирдах зөвлөлийн хуралд танилцуулж байх; 12.8.8. Санхүүгийн алба нь өөрийн үйл ажиллагааг хэрэгжүүлэхтэй холбогдсон журмыг боловсруулан Удирдах зөвлөлийн хурлаар хэлэлцүүлэн батлуулж, мөрдөх. 12.9. Хяналтын хороо 12.9.1. Дүрэм, ёс зүйн хороо нь 3 гишүүнтэй байна. 12.9.2. Хорооны гишүүдийг нийт гишүүдийн санал асуулгаар сонгоно 12.9.3. Хорооноос даргыг сонгож, журмын дагуу ажиллана. 12.9.4. Дүрэм, ёс зүйн хороо нь дараах эрх, үүрэгтэй: 12.9.5. “Монголын үндэсний морьт харвааны холбооны ёс зүйн дүрэм”-ийг боловсруулан Удирдах зөвлөлийн хурлаар батлуулж, мөрдүүлэх; 12.9.6. Холбооны үйл ажиллагаатай холбоотойгоор гарах дүрэм, журмыг боловсруулж, Удирдах зөвлөлөөр батлуулах; 12.9.7. Зөвлөл нь холбооны ёс зүйн дүрмийг удирдлага болгон холбооны гишүүд, дасгалжуулагч, тамирчид, шүүгчдийн сахилга бат, ёс зүйтэй холбоотой асуудлыг хэлэлцэж, дүгнэлт гаргана. Дүгнэлтийг үндэслэн Удирдах зөвлөл тогтоол гаргана. 12.10. Шүүгчдийн зөвлөл Шүүгчдийн зөвлөл нь 5 гишүүнтэй байна. Шүүгчдийн зөвлөлийг удирдах зөвлөлийн хурлаар нь дараах эрх, үүрэгтэй: 12.10.1. Морьт харвааны шүүгч нарын сургалт, семинар зохион байгуулах; 12.10.2. Холбооны цол, зэргийн зөвлөлд шүүгчдийн цол зэргийн асуудлаар санал оруулах; 12.10.3. Шүүгчдийг олон улсын сургалт, семинарт хамруулж улмаар Олон улсын болон тивийн шүүгч бэлтгэх; 12.10.4. Дэлхийн байт харвааны холбооны тэмцээний дүрэмд орсон нэмэлт өөрчлөлтүүдийг цаг тухай бүрт нь танилцуулах, мэдээлэх ажлыг зохион байгуулах; 12.10.5. Холбооноос баталсан хуваарийн дагуу зохиогдох тэмцээнүүдэд шүүгчдийг томилж, шүүх үйл ажиллагааг удирдан зохион байгуулах; 12.10.6. Тэмцээний талбайг бэлтгэх үйл явцад болон тэмцээний үеийн аюулгүй ажиллагаанд хяналт тавих. 12.11. Тамирчдын зөвлөл Тамирчдын зөвлөл нь холбооны бүх гишүүн клуб тус бүрээс сонгогдсон багийн ахлагчдаас бүрдэнэ. Тамирчдын зөвлөл нь дараах чиглэлээр үйл ажиллагаа явуулна. 12.11.1. Холбооноос зохион байгуулж буй бүхий л үйл ажиллагаанд баг тамирчдыг идэвхтэй оролцуулах; 12.11.2. Тамирчдын дунд спортын ур чадвараа дээшлүүлэх болон соёл, хүмүүжил, боловсролын чиглэлээр сургалт, ажлуудыг зохион байгуулах; 12.11.3. Тамирчдад холбооны аюулгүй ажиллагааны дүрэм болон сахилга бат, ёс зүйн дүрмийг таниулах, мөрдүүлэх. 12.11.4. Холбооны дэргэдэх зөвлөлүүдтэй хамтран ажиллах 12.12. Холбооны удирдлага, ажиллагсдыг ажлаас чөлөөлөх үндэслэл 12.12.1. Холбооны эрх ашигт ноцтой хохирол учруулсан, үүргээ зохих ёсоор биелүүлээгүй, албан тушаалаа хэтрүүлэн болон урвуулан ашигласан 12.12.2. Гэмт хэрэг үйлдсэн нь шүүхээр тогтоогдсон, ял шийтгүүлсэн; 12.12.3. Эмнэлгийн байгууллага, мэргэжлийн эмчийн дүгнэлтээр эрүүл мэндийн хувьд албан үүргээ гүйцэтгэх чадваргүй нь тогтоогдсон 12.12.4. Өөрөө сайн дураар огцрох хүсэлтээ бичгээр гаргасан тохиолдолд Удирдах зөвлөлийн хурлын шийдвэрээр албан үүргээс нь чөлөөлнө. 12.12.5. Хувийн болон бусад шалтгаанаар Их хурлын хугацаанд холбооны алив үйл ажиллагаанд оролцоогүй Удирдах зөвлөлийн гишүүдийг чөлөөлөх бөгөөд дахин хүсэлт гаргах эрх нь нээлттэй.